Roobni waktii Gannaa barana oomisha qonnaaf mijaata ta’uu Inistitiiyuutii Mitiworoloojii Itiyoophiyaatti Giddu galli Tajaajila Meetiworooloojii Bahaa fi Giddu galeessa Oromiyaa beeksise
Roobni waktii Arfaasaa ture idileefi idileen gad ta’uunis himameera
Kanaanis ho’i akka malee dabaluufi haalli qilleensaa guyyaa guyyaan jijjiiramaa turuu Inistitiiyuutii Mitiworoloojii Itiyoophiyaatti hoji gaggeessaan Giddu gala Tajaajila Meetiworooloojii Bahaa fi Giddu galeessa Oromiyaa Obbo Abdiisaa Hirkoo dubbatan.
Roobni waktii Gannaa ammoo idileefi idileen ol jedhame ni eeggamas jedhan.
Keessattuu Godinaalee Lixaafi Giddu Gala Bahaa Oromiyaa rooba idileefi idilee ol argatu jedhan.
Iddoolee muraasaatti guyyoonni camaa jiraachuu akka danda’u raagni ni agarsiisa jedhan Obbo Abdiisaan.
Roobni gahaan iddoolee baayyeetti waan jiruuf hawaasaaf abdii gaarii ta’uu ibsaniiru.
Waktii Gannaa oomisha qonnaa biyyaa keenyaaf akkaan eeggaman keessaa tokko ta’uu kaasuun, roobni gannaa kunis oomisha qonna miilanaaf mijaata ta’uu kaasan. Keessattuu Oomisha midhaanii,qophii ashaaraa magariisaa,hawaasa naannoo gammoojjii jiraatanis bishaan yoo kuufatan waktii bonaaf bishaan dhugaatii beelladaafi jallisiif fayyadamuu danda’u jedhan.
Akkasumas hawaasni naannoo gammoojjii jiraatanis raagni roobaa jiru keessaayyuu Oomishaa baatii lamatti gahaniif carraa gaarii waan ta’eef itti fayyadamu qabuu dhaaman.
Bahiinsi waktii Gannaa waan dheeratUufis qonnaan bulaan oomisha waktiisaa waliin deemu facaasuu akka qabu akeekan.
kana ala Iddoowwan tokko tokkootti roobni yaandoo jiraachuu waan maluuf of eeggannoo ni barbaachisa jedhan.
Keessayyuu hawaasni gaarreen jala, laggeen qarqara, sululoota lageen Awwaash Gibee, Gannaalee faa’a keessaafi dhheenya hawaasni jiraatu miidhaa lolaa mudachuu maluurraa gamanumaan of eeguu akka qabu hubachiisaniiru.
Kana malees dhiqamni biyyee,sigigaafi ciccituun lafa mudatu mala jedhan.
Qonnaan bulaanis Roobni gahaa waan jiruf ooyiruurraa bishaan roobaa kuufame midhaan akka hin balleessineef bo’oo lolaa baasuu akka qabus dhaaman. Magaalonnis gamanumaan bo’oo lolaa qulqulleessuu akka qaban akeekaniiru. Ayinaalem Tarrafaan.
