Wiirtuun Qorannoo Qonna Malkaa Sa’aa Muuzii sanyii filatamaa bilchaatee nyaatamu qorannoon argachuu ibse. Muuziin sanyii filatamaa haaraa qorannoon argame kunis bilcheeffamuun buddeen, Daabboofi Marqaa ta’ee nyaatamuu danda’a jedhameera.
Inistitiyuutii Qorannoo Qonnaa biyyoolessaatti qindeessaan muduraalee gammoojjiifi badda daree Obbo Markabuu Ayyaalew, Muuziin haaraa qorannoon argame albuuda ol’aanaa qabaachuu ibsuun, bifa adda addaan goggogsuun muuzii harka 6o midhaan harka 40tti makuun bilcheessanii nyaachuun nyaata gabbataa argachuuf gumaacha jedhan.
Muuziin sanyii filatamaa duraan hektaara tokkorraa kuntaala dhibba 2 oomishamaa tures, dachaa afurii oliin dabaluun hanga kuntaala dhibba 600 argamuu danda’a jedhan. Muuziin kun dhibee kan dandamatuufi dhaabamee ji’a torba keessatti gahas jedhameera.
Muuzii dabalatee bu’aa qorannoo muduraaleefi midhaan garaagaraa argatan qonnaan bultootaaf kennuun oomisha qonnaa dabalaa jiraachuus Daarektarri Ol’aanaa wiirtuu Qorannoo Qonnaa Malkaa sa’aa Dr. Amaaree Fufaa ibsaniiru.
Muuzii sanyii filatamaa bilchaatee biiffee ta’uufi oomisha olaanaa qabu qoratanis qonnaan bultoota Godinaalee Shawaa Bahaafi Arsii daawwachiisuun hubannoo kennuufii himan.
Inistitiyuuutii qorannoo qonnaa biyyoolessatti daarektarri midhaanii Dr. Fiqaaduu Gurmuu Itiyoophiyaan wabii nyaataan akka of dandeessuuf bu’aalee qorannoo haaraa babal’isuun hawaasatti madaqsaa jiraachuu eeran. Kuraabaachoo Geetuun
