‘OBN Cyber Media’ Amajjii 26,2017-Naannoo Oromiyaatti tattaaffi babal’ina dhibee busaa to’achuuf hojjetameen tatamsa’ina dhukkubichaafi miidhaa sababa dhukkubichaan qaqqabu hir’isuun danda’amuu, Biiroon Fayyaa naannichaa beeksise.
Hogganaa Itti aanaan biiroo Fayyaa Oromiyaa Dr Bokonaa Guutaa akka himanitti, waggoota daraban tatamsa’inni dhibee busaafi baay’inni namoota dhukkubichaan qabamanii dabalee ture.
Bara bajataa kana ji’oota jahan darban garuu naannichatti qooda fudhatoota sadarkaan jiran waliin ta’uun ganda irraa jalqabee hojii hojjetameen tatamsa’inaafi lakkoofsa namoota dhukkubichaan qabamanii hiri’isuun danda’ameera.
Naannichatti dhukkubni busaa miidhaa geesisaa kan ture sababa hanqina qorichaan qofaa osoo hin taane; haala raabsa qorichaafi itti fayyadama isaarratti hanqinni waan tureef akkasuma hojiiwwan dhukkubicha ittisuuf barbaachisan sirritti hojjetamuu dhabuurra kan maddedha jedhaniiru.
Hanqinni qoricha dhukkuba busaa akka hin mudanne Biiroon Fayyaa Oromiyaa dhaabbilee deeggartootaa waliin hojjecha turuu himaniiru. Mootummaan naannichaa bajata dabalataa ramaduun qorichi akka hundaa qaqqabu taasiseera jedhan.
Kanaanis tatamsa’ina dhibichaa ittisuufi sababa dhukkubichaan miidhaa qaqqabu hiri’isuu irratti hojiin bu’a qabeesa ta’e hojjetameera jedhaniiru.
Ta’us garuu mallattoon dhukkuba kana ammas hawaasa keessa waan jiruuf raabsaa qorichaa fi fayyadama isaa irratti hojjechuu qofaa osoo hin taane hojii dursanii ittisuu kanneen biroo irrattis haalaan hojjetamu akka qabu hubachiisaniiru.
Haaluma kanaan bakka walhormaata bookee busaa balleesuu fi qulqulleesuu, Agoobara karaa sirriin fayyadamuu akkasuma gorsa fi waldhaansa fayyaa ogeeyyiin fayyaa kennan karaa sirriin hojiirra oolchuun dhukkubicha ittisuun barbaachisaadha jedhaniiru.TOI
