Miseensi Gadaa karrayyuu Rubboo yokaan Foolleen Gadaa Birmajjii Aanaa Fantaallee Ardaa jilaa Dhaddacha Ballaatti sirna gurmaa’isa caasaa ijaarrate.
Sirni caasaa Gadoomaa ijaarrachuu kunis Qe’ee Bokkuu qubachuun mijuu eebbifatanii korma jiksuun eegala.
Rubboon jila Robbummaa waggaa 8 geggeessee xumuraa jira.
Rubboon kan waggaa afurtama abbootiin isaanii geggeessan dhaqqabachuun gammachuu itti dhagahame ibsatu.
Jilli Rubboon geggeessu kunis Bokkuun hogganama.
Miseensi isaanii bakka lamatti qoodamuun foon looniifi aannan dhugaa jila isaanii Baatii tokkoof itti fufiinsaan raawwatu.
Rubboon foon sangaa qalamee malee miya garaa keessaa kan akka tiruu, kalee, garaachaafi kanneen biroo hin sooratan.
Maaliif jennaan warri sirna walii ijaaru garaa wal hin nyaatu, tokkummaasaa cimsata waan ta’eefi jedhan, Abbaan Sabbataa yokaan Itti Aanaan Bokkuu Gadaa Karrayyuu Roobaa Boruu.
Rubboon jila Rubbomaa yoo raawwatan foon Re’eefi Gaalaas ta’e aanaan isaaniis hin sooratan.
Sirna Bulchiisa Gadaa barataa waan jiraniif akka Qaalluutti ilaalamus jedhan.
Jila kanaan Gadaa jiituu nuuf godhi jedhanii roobaafi nagaa waaqa kadhatu.
Magarsaa Kabbadaatiin
