Gadaan Booranaa dameewwan gugurddoo: Warra Bokkuufi Warra Qaalluu jedhamu qaba.
Warrii Bokkuu damee abbootii Gadaa kana hawaasan filatamanii baallii fudhatanidha.
Warrii Qaalluu immoo kan filatamuu adoo hin taane karaa hidda dhalootaan qaalloman.
Boorannii Qaalluu 5 qaba:
1.Qaalluu Odituu
2.Qaalluu Karrayyuu
3.Qaalluu Maxxaarrii Garjeedaa
4.Qaalluu maxxaarrii Kuukkuufi
5.Qaalluu maxxaarrii Karaaraa jedhamuun beekkamu.
Gadaana Booranaa sirna gadoomaa xumuratee baallii kennuun dura erga jila odaa jilateen boodatti Qaalluu muuda.
Qaalluu muuduuf gadaan sadeen: Gadaa Arboora, Gadaa Hawaxxuu fi Gadaan Koonnituu qa’ee qaalluutti imalu. Qaalluu muuduun muudamsa aangoo siyaasaa kanaa osoo hin taanee kennaawwan garaagaraa (horii) qabatanii qaalluuf geessu.
Yeroo kanatti faaruu muudaa faarsaa qa’ee qaalluutti olseenan jedhu Abbootiin Gadaa Booranaa.
Qaalluunis warra Gadaa kan isa muuduuf dhufe kana simachuun qumbii tufeefii eebbisa.
Namii qaalluu muude eebba, hormaataafi bultuma argata jedhamee amanama.Qaalluu 5’n akkaatuma innii wal angafuun muudan.
Qaalluun Gadaan Booranaa jalqaba muudu kun gosa Booranaa keessaa kan damee Odituuti.Sababii jalqaba muudaniif qaalluun Odituu kun damee Booranaa keessaa angafa kan ta’e damee Fulleellee waan ta’eefidha. Fulleelle angafa Boorana guutuuti jedhan bokkuun gadaa Koonnituu Aabba Jaarsoo Jiloo.
Maqaan Qaalluu Odituu kun iddoo Kuraa jedhama. Qaalluu iddoo Kuraa yeroo Gadaan baallii kennuuf qophaa’u kanatti innis yaa’a qopheeffatee, jila odaa jilatee qophii addaa addaa taasisa.
Gadaan erga Qaalluu Odituu muudaniin duubatti Qaalluu gosa Karrayyuu fi Maxxaarrii sadeenis yeroo itti aanutti muudan. Jultii muuda Qaalluu kunis ayyaana 27n Booranaa keessaa ayyaana ‘Walla’ fi ‘Salbaana’ jedhamu jilatama.
Kanaaf yoo faaruu muudaa dhahatan “Ayyaannii kee Walla, naqaan tee Salbaana” jechuun faarsu.
Jilli muuda Qaalluu odituu kunis Areerootti ardaa jilaa Olgabbisa jedhamutti jilatama jira. Boruu Konsoon
