Dhaabbanni Gorsaa dhimma barnootaa ‘Aim Ultra’ jedhamu Hayyama daldalaa dhimma gorsaa irratti fudhate dahoo godhachuun, namoota biyya alaatti nan erga jechuun erga maallaqa fudhatee booda, nu gowwomse jechuu, miidhamtonni OBN’tti himan.
Finfinnee walakkatti Biiroo banatee namoota beekkamtii qabaniin beeksisaa waan tureef, yeroof dhugummaan isaa nu hin shakkisiisne jedhan.
Torbee lamaan dura komiin saamamneerra jedhu gara OBN dhaqqabnaan, nus ragaalee dhugummaa komii kanaa nuuf raggaasisan walitti qabuu eegalle.
Dhaabbanni komatame, dhaabbata gorsaa barnootaafi qindeessaa ragaa ‘‘Aim Ultra’’ jedhamu yoo ta’u, hayyama daldalaa Gorsaa dhimma barnootaa fi qindeessaa ragaa ta’uu isaa, namoota biyyattiitti beekkamtii qabaniin beeksifamaa turuu argine.
Dhaabbanni dhuunfaan ‘Aim Ultra educational Consultancy’n, dargaggoota gara biyya alatti ergee, carraa hojii akka argataniif haala nan mijeessa jechuun, kaffaltii tajaajilaaf barbaachisu walakkaa kaffalanii, kan hafe bakka deemanitti hojjetanii akka kanfalaniif erga walii galee booda, nu gowwoomseera jechuun, miidhamtoonni dubbatan
Magaalaa Finfinnee walakkaatti biiroo guddaa kireeffatee ifatti hojjetaa ture waan ta’eef, seera qabeessummaan isaa yeroof nu hin shakkisiisnes jedhan.
Yeroo humna qabnutti, hojjennee rakkoofi gadaadoo maatii keenyaafi nurra jiru obbaafanna jennee, maatii rakkisne, maallaqa erga kanfallee booda nu milaamilchaa har’a gahe jedhan.
Biiroo isaanii jijjiiruun namoota jalaa miliquu, teessoon isaanii yoo bira gahame biirootti argamuu dhabuufi akka biiroo hin seenneef waardiyyootaan dhoorkamaa turuus kaasan.
Nutis bilbilaan namoota dhaabbata kana keessatti itti gaafatamummaa qabu jedhaman bilbilaan qunnamuuf yaallee dadhabnaan wayita qaamaan barbaacha deemneetti Biirolee kireeffatanii keessa turan jedhametti isaan argachuu hin dandeenye.Namoonni manneen itti kireessanis nutiyyuu wajjiin rakkanneerra nuun jedhan
Dhimma kana yeroo garagaraatti, qaamolee seeraa naannolee waajjirri dhabbaticha argamutti iyyannus, dhaabbata ifatti maallaqa keenya saamu dhiisanii, nu’iin akka balleessaa qabnutti nugaafataa turan jedhu miidhamtoonni
Ammas taanaan dhabbanni kun hoteelotaafi iddoo garagaraatti hojii goyyomsaa itti fufeera waan ta’eef, dhaloonni irra akka ofeegatan dhaaman.
Mootummanis, namoota gochaa daddabarsa namootaa irratti hirmatan kanneen seeraan akka qoratuufi maallaqa keenya akka nuuf deebisiisu gafannas jedhan. OBN s dhaabbata kana irraas ta’ee caasaalee mootummaa dhimmichi ilaallatu irraa deebii argachuuf torbee lamaa oliif eegnee deebii hin arganne. Akkuma arganneen walitti deebina. Qalbeessaa Takkaallinyitu gabaase
Nice👍