‘OBN Cyber Media’Guraandhala 01,2018
Oromoon sadarkaa gaanfa Afrikaatti saba guddaa aadaa, duudhaa, seenaafi afaan mataa isaa qabuufi Sirna Gadaa ofiin hundeessuun ittiin bulaa turedha.
Sirna kana keessatti safuun ummataafi uumamaa, hangafaafi quxusuu, guddaafi xinnaa akkasumas duudhaan kabajamee jiraatamaa ture.
Erga sirna bittaa jalatti Oromoon kufee garuu, Sirni Gadaa laafee aadaa, duudhaafi safuun duraan turan hundi ni laaffatan.
Mootummaan Naannoo Oromiyaas, Oromoo duudhaa isaa ganamaatti deebisuuf jijjiiramaan asitti haaromsa aadaa taasisuun jijjiiramni guddaan gama hundaan argamaa jira.
Haaromsi aadaa kunis adeemsa yaadaa fi gochaa ummanni Oromoo qabu bu’uura aadaa isaa eeggachaa haalota yeroo wajjin akka walsimu taasifachuun ittiin jireenya hawaasaa qajeelchuudha.
Kunis duudhaa, safuu, afaan, ogummaa fi haala jireenya dur irraa dhufan bakkatti deebisuu qofa osoo hin taane, wantoota yeroo ammaa fi egeree tajaajilan itti ida’uun haaromsuu jechuudha.
Haaromsa aadaa yeroo jedhamu, akka waan aadaa duraan hin turre uumuutti namoonni karaa dogoggoraan hubatan ni jiru.
Haaromsi aadaa garuu haala jireenya hawaasaa ifaafi madaalawaa ta’e haala yeroo ammaa waliin gama siyaasaa, hawaasummaafi diinagdeen ijaaruun eenyummaa Oromoo cimsuu, tokkummaafi waliigaltee walii isaafi hawaasa biroo waliin qabu dagaagsuuf kan labsame dha.
Bu’aan haaromsa aadaa akka Oromiyaatti hojiirra oole kunis hawaasa keessatti jijjiirama ilaalcha gaarii, jireenya qajeelaa fi abdii egeree ifaa ta`e uuma. Aadaan haaromfame dandeettii namoonni qaban kakaasuun hojii kalaqaa, ogummaafi aadaa hojii ni jajjabeessa.
Akkasumas wal kabajaa, nageenya, haqaafi waliigaltee hawaasaas ni cimsa.
